Wafanyabiashara wa Daladala Songea Wagoma Kufanya Kazi Zao Kwa Madai ya Kuunga Mkono Mgomo wa Wafanyabiashara Unaoendelea.

Mgomo wa wafanya biashara umeendelea kuchukua sura mpya baada ya wafanya biashara wa daladala mjini Songea kugoma kufanya kazi toka asubuhi kwa madai ya kuunga mkono mgomo wa wafanya biashara unaoendelea katika mikoa mabalimbali nchini ili kushinikiza serikali kumuachilia kiongozi wao Bwana Joseph Minja pamoja na kutatua madai yao ya matumizi ya mashine za EFDS pamoja na ongezeko la kodi kwa asilimia mia moja.

 

Kwa mujibu wa mwandishi wetu aliyepo mjini songea hali hiyo imesababisha usumbufu mkubwa kwa wakazi wa songea ambao wamelazimika kutembea kwa miguu kwenda maeneo mbalimbali ya mji huo ambapo jeshi la polisi limeimarisha ulinzi katika maeneo mbalimbali ya mji huo.

Wakati  hayo  Yakijiri,Naibu Spika wa Bunge  leo ameiagiza Kamati ya Uongozi kukutana na serikali kutafuta suluhu ya suala la mgomo wa wafanyabiashara unaoendelea nchini.

MAUAJI TENA: Mfanya biashara Arusha adaiwa kumuua rafiki yake

MFANYABIASHARA maarufu wa madini ya tanzanite jijini Arusha, Felix Mmasi (41) anashikiliwa na Jeshi la Polisi mkoani Arusha akituhumiwa kumpiga risasi kwa kutumia silaha aina ya bastola mtu anayedaiwa kuwa ni rafiki yake na kumsababishia umauti. 

Tukio hilo limethibitishwa na Kamanda wa Polisi mkoani Arusha, Liberatus Sabas alipoulizwa na mwandishi wa gazeti hili juu ya kuwepo kwa tukio hilo. 

Sabas alikiri Polisi kumshikilia mtuhumiwa huyo, lakini alisema taarifa rasmi ya tukio hilo atazitoa leo kwa waandishi wa habari mara baada ya kuchukua maelezo kwa mtuhumiwa. 

Katika Kituo Kikuu cha Polisi, wafanyabiashara wa madini na watu wengine walimiminika kumshuhudia mwenzao, huku wengine wakionekana kutafuta njia za kutoa kila aina ya msaada kwa mwenzao.

Vurugu na Matusi Zatawala Kwenye Semina ya Wabunge Kuhusu Sakata la Mahakama ya Kadhi......Wabunge Wegi Wapinga Kuanzishwa Kwa Mahakama hiyo

Mambo magumu yameibuka katika suala la kujadili uanzishwaji wa Mahakama ya Kadhi, baada ya kutokea  malumbano makali na vurugu huku idadi kubwa ya wabunge wakiitaka serikali kuuondoa Muswada wa Mahakama ya Kadhi usiwasilishwe bungeni. 

Wabunge wengi walisema kufanya hivyo kunaweza kusababisha mpasuko na kuvunjika kwa amani nchini.

Aidha, wamesema suala la Mahakama ya Kadhi linataka kufanywa kama mtaji wa kisiasa kwa baadhi ya viongozi wanaotaka kuwania urais katika uchaguzi mkuu mwaka huu ili kutafuta kura za Waislamu.

Mvutano huo uliibuka jana wakati wa semina ya wabunge kujadili Muswada wa Sheria mbalimbali wa mwaka 2014 ambao ndani yake kuna  Muswada wa Mahakama ya Kadhi ambao umepangwa kuwasilishwa Aprili Mosi mwaka huu siku ya kuahirisha mkutano wa 19 wa Bunge.

Mbunge wa Ngara (CCM), Deogratias Ntukamazina, alisema Kamati ya Katiba Sheria na Utawala ilipowaita viongozi mbalimbali wa dini kuzungumzia suala hilo Waislamu walitofautiana katika suala la uteuzi wa Kadhi kufanywa na Mufti Mkuu wa Tanzania na wakataka waelewane kwanza kabla ya suala hilo kupelekwa bungeni.

Alisema katika mkutano huo makundi 11 ambayo hayakubaliana na Baraza Kuu la Waislamu Tanzania (Bakwata), walisema Muswada wa Mahakama ya Kadhi uletwe bungeni baada ya kuridhiana kwa sababu hawakubaliani na Bakwata ambalo kiongozi wake ni Mufti Mkuu wa Tanzania.

Walisema maaskofu walisema hawana tatizo na suala la Mahakama ya Kadhi, lakini isiwe na muundo kama wa mahakama nyingine na kwamba mawazo ya waasisi wa Taifa, hawakutaka serikali iwe na dini na ndiyo maana hawakuruhusu mahakama hiyo.

Mbunge wa Viti Maalumu (CUF), Rukia Kassimu, alihoji ni kwanini Mahakama ya Kadhi inataka kuundwa na kupewa jukumu Mufti ambaye anatoka Bakwata ambayo ni taasisi binafsi na imesajiliwa na Mamlaka ya Rita.

“Bakwata ni taasisi kama zilivyo taasisi nyingine, haikubaliki, Mheshimiwa Waziri Mkuu aliahidi suala la Mahakama ya Kadhi ili Waislamu wampigie kura kwa sababu anataka kugombea urais mwaka huu,” alisema.

Rukia alisema ni marufuku serikali kuwalazimisha Waislamu kuwa chini ya Bakwata na kwamba Waziri Mkuu, Pinda anafahamu kwa kina suluhisho na mvutano huo wa Mahakama ya Kadhi.

Mbunge wa Kasulu Mjini (NCCR), Moses Machali,  alisema suala la kuanzishwa kwa Mahakama ya Kadhi na kuingizwa katika mfumo wa mahakama za kawaida inajichanganya na ibara ya 19 ya Katiba ya Jamhuri ya Muungano wa Tanzania.

Alisema mwaka 2011 Rais Jakaya Kikwete wakati anazindua msikiti wa Gadaf alisema suala la uanzishwaji wa Mahakama ya Kadhi lisihusishwe na serikali kwa sababu wapo watu wengine ambao kila mmoja ana imani yake.

Alisema hatua ya serikali kutaka kuuleta muswada huo wakati bado Waislamu wenyewe hawaelewani ni kuwakosea Waislamu na kwamba inawezekana Waziri alilizungumzia suala hili sababu ya malengo yake ya urais.

Machali alisema kama muswada huu utapelekwa Bungeni itatoa fursa kwa madhehebu mbalimbali kila moja kuanzisha mahakama yake hali itakayoleta machafuko nchini kwa kuwa nchi itakuwa katika mfumo wa mahakama za dini.

Mbunge wa Singida Mashariki (Chadema), Tundu Lissu, alisema muswada unapendekeza kutambua kitu ambacho mfumo wa sheria za nchi hauna na kwamba uongo unaotumiwa na serikali ndiyo unafanya watu wawe na hofu.

Mbunge wa Nkasi Kusini (CCM), Ally Kessy, alisema: “Katika nguzo tano za Kiislamu Mahakama ya Kadhi haipo, nguzo sita za imani pia haipo, sasa inakuwaje wanadai kitu ambacho hakitambuliki katika nguzo za kiislamu.”

Mbunge wa Sumve (CCM), Richard Ndassa, alisema muswada wa Mahakama ya Kadhi urudishwe ukaboreshwe badala ya kuharakisha kuupeleka bungeni wakati bado una utata hata kwa waislamu wenyewe.

Mbunge wa Tarime (CCM), Nyambali Nyangwine, alisema Muswada  wa  Mahakama  ya  Kadhi usimamishwe ukafanyiwe utafiti kwanza kwa sababu ndani ya Waislamu wenyewe hawaelewani.

Mbunge wa Rombo (Chadema), Joseph Selasini, alisema Wabunge wasipokuwa makini na suala la Mahakama ya Kadhi, Bunge litaingia katika historia kuvunjika kwa amani.

Selasini alisema serikali iachane na kutoa ‘jini’ lililofungiwa na waasisi Mwalimu Nyerere na Karume na kwamba tukifanya mchezo nchi itabaki katika vipande vipande.

Mbunge wa Viti Maalum (CCM), Dk. Mary Mwanjelwa,  alisema jambo hili litaligawa Taifa na kwamba waasisi hawakuwa wajinga walipokataa serikali isiwe na dini.

Mbunge wa Gando (CUF), Khalifa Suleiman Khalifa, alisema nchi inaelekea kubaya kwani msingi wa kuleta Mahakama ya Kadhi ni kutaka kuwachota Waislamu kwa ajili ya uchaguzi mkuu.

“Serikali kama imedhamiria kuleta Mahakama ya Kadhi ilete katika utaratibu mzuri, lakini kwa huu utaratibu ni unafiki na mwenyezi Mungu hapendi unafiki, tusiwahadae Waislamu,” alisema.

 Khalifa alisema kwa hali ilivyo muswada huo haujaiva na kwamba usiletwe  bungeni hadi hapo serikali itakapojipanga vizuri.

 Mbunge wa Mbozi Magharibi (Chadema), David Silinde, alisema suala la imani siyo la chama cha kisiasa kwani suala la Mahakama ya Kadhi litaipeleka nchi kubaya na inawezekana ikawa ndio mwisho wa Chama Cha Mapinduzi (CCM).

“Mnataka kutuvurugia nchi sababu ya kutafuta kura za Waislamu, kwa hili Waziri Mkuu umechemka sana, nalisema hili kwa sababu wewe Waziri Mkuu ndiye uliyeahidi kuleta bungeni Muswada wa Mahakama ya Kadhi,” alisema.

Mbunge wa Kisarawe (CCM), Suleiman Jafo, alisema yasifanyike masikhala mswaada huyo uwasilishwe bungeni.

Mbunge wa Mbeya Vijijini (CCM), Mchungaji Lackison Mwanjale, alisema serikali ikajipange upya katika suala la Mahakama ya Kadhi kabla ya kuuleta bungeni muswada kwani bado suala hilo halieleweki kwa jamii.

Mbunge wa Kilwa Kaskazini (CCM), Martaza Mangungu, alisema hakubaliani na suala la Mufti kupewa jukumu la kuchagua Kadhi Mkuu wakati Waislamu wengi hawakubaliani na Bakwata ambayo inaongozwa na Mufti.

Mbunge wa Lupa (CCM), Victor Mwambalaswa, alisema muswada wa Mahakama ya Kadhi wapelekewe wahusika kabla ya kuletwa bungeni ili wajadiliane na kukubaliana mambo ya msingi wanayoona yatawafaa katika uanzishwaji wa mahakama hayo.

 Mbunge wa Igunga (CCM), Dk. Peter Kafumu, alisema serikali imeshindwa kusimamia vizuri suala la uanzishwaji wa Mahakama ya Kadhi kwa kushindwa kuwaelimisha wananchi jambo hilo.

Mbunge wa Chwaka (CCM), Yahaya Kassim Issa, alisema  Waislamu wanataka Mahakama hiyo kwa kuwa wanakosa haki hivyo serikali iruhusu kuanzishwa kwake.

Pinda: Tutatafakari  Upya

Waziri Mkuu, Mizengo Pinda, akihitimisha mjadala huo alisema kulingana na maoni yaliyotolewa na Wabunge ameelewa kwamba bado hakuna maelewano miongoni mwa Waislamu wenyewe na pia hakuna uelewa wa jamii kuhusu suala hilo.

Alisema mambo yaliyowasilishwa kuhusiana na muswada huo ni maamuzi ya Bunge Maalum la Katiba na siyo yake, bali anabebeshwa msalaba tu kwa sababu alikuwa anaiwakilisha serikali.

Pinda alisema kutokana na hali hiyo, serikali itakaa kushauriana tena na Spika pamoja na Rais waone wafanye nini katika jambo hilo.

Vijembe  na  Matusi

Mbunge wa Tabora Mjini (CCM), Ismail Aden Rage, wakati akichangia hoja hiyo alishindwa kuvumulia baada ya baadhi ya wabunge kuingilia mchango wake kwa kumzomea na kusema maneno yaliyomuudhi na kuamua kuwatolewa maneno ya kuudhi (matusi).

Mbunge wa Fuoni (CCM), Said Mussa Zubeir, aliwaita baadhi ya wabunge walikuwa wakimzomea wakati akizungumza kuwa ni ‘wapumbavu’.

Wakati wa majadiliano hayo ilipofika saa 8:17 wakati Mbunge wa Kisarawe, Jafo akiendelea kuchangia kulitokea vurugu ambazo nusura wabunge wapigane huku baadhi yao wakiamua kutoka ukumbini.

Kutokana na kutokuwapo hali ya utulivu ukumbini, baadhi ya askari pamoja na maofisa usalama waliokuwapo nje, walilazimika kuingia ndani kuhakikisha amani haivunjiki.

Spika wa Bunge, Anna Makinda, alituliza  vurugu  ukumbini kwa kuwataka wabunge wawe wavumilivu wakati wenzao wakichangia.

Katika majadiliano wabunge zaidi 30 walichangia na zaidi ya 20 walikataa muswada wa Mahakama ya Kadhi usiwasilishwe Bungeni  siku ya Jumatano wiki hii.

Kabla ya kuanza majadiliano, Mbunge wa  Kuteuliwa, James Mbatia, alitoa hoja kwa Kaimu Mwenyekiti wa Kamati ya Bunge, Katiba, Sheria na Utawala, William Ngeleja, kwamba wakati wa majadiliano waandishi wa habari wasiwepo ukumbini kwa kile alichoeleza ni unyeti wa jambo hilo.

Hata hivyo, Mbunge wa Nkasi Kaskazini, Kessy, alisema kama waandishi wataondolewa ukumbini naye atalazimika kuondoka huku Mwanasheria Mkuu wa Serikali, George Masaju, akisema hakuna sababu ya kuwaondoa waandishi kwa sababu jambo linalojadiliwa wananchi wanataka kulifahamu kupitia vyombo vya habari.

ASANTENI WAKAZI WA ILEJE KWA KUTUAMNI . SHUKRANI ZA DHATI : CHADEMA KUPITIA BAVICHA MBEYA . 2015 NI SWALA LA MAHESABU TU

Hali ya Gwajima Bado ni Tete......Bado yupo Chumba cha Uangalizi Maalumu (ICU) TMJ. Dr. Slaa, Baregu Wamtembelea.

Wakati hali ya kiongozi wa Kanisa la Ufufuo na Uzima, Askofu Josephat Gwajima, ikiwa tete kwa siku mbili mfululizo, Jeshi la Polisi na waumini wa Askofu huyo wanadaiwa kuvutana hospitali inayofaa kumpa matibabu.

Askofu Gwajima, alizimia ghafla juzi majira ya saa 2: 45 usiku akiwa kwenye chumba cha mahojiano katika Kituo cha Polisi Kati, baada ya kutuhumiwa kumkashifu na kumtukana kiongozi wa kanisa la Katoliki Jimbo kuu la Dar es Salaam, Mwadhama kadinali Polycap Pengo.

Hata hivyo, mara baada ya kutokea tukio hilo, Askofu huyo alichukuliwa akiwa katika hali ya kuzirai na kuanza kuzungushwa katika hospitali tofauti wakati waumini walitaka apelekwe Hospitali ya TMJ Mikocheni, Jeshi la polisi lilitaka apelekwe hospitali za Jeshi na Muhimbili.

Tukio hilo ambalo mwandishi wetu  alilishuhudia, lilianza majira ya saa 3:00 usiku alipopoteza fahamu hadi majira ya saa 8:00 usiku ambapo walikubaliana apelekwe Hospitali ya TMJ ambako anaendelea kupatiwa matibabu.

Hali ilivyokuwa polisi kati.

Baada ya kuwasili kituoni hapo majira ya saa 8:15 alasiri, alikwenda moja kwa moja katika chumba  maalumu kilichoandaliwa kwa ajili ya kuhojiwa tuhuma zinazomkabili.

Mahojiano rasmi yalianza majira ya saa 8:45 mchana. Ilichukua  muda wa saa saba ndani ya chumba hicho, na ilipofikia saa 1.05 usiku, hali ya Askofu Gwajima ilibadilika ghafla.

Baadhi ya askari na viongozi wenzake walionekana kujaribu kutumia njia mbalimbali ikiwamo kumpeleka chooni ili kumrudisha hali yake ya kawaida, lakini ilishindikana.

Aliporudi ndani, aliishiwa nguvu na kupoteza fahamu kitu ambacho kilizusha taharuki ndani ya ukumbi huo.

Chanzo cha kuzimia.

Taarifa kutoka ndani ya kikao hicho kilieleza, hali yake ilibadilika ghafla baada ya kuanza kuhojiwa kuhusu mali anazomiliki ikiwamo helikopta aliyoinunua hivi karibuni.

Aidha mambo mengine aliyotakiwa kueleza ni uhusiano wake na wanasiasa mashuhuri pamoja na akaunti anazomiliki na njia anazopata pesa.

“Mahojiano yalikwenda vizuri, lakini ilipofikia zamu ya kumhoji mali anazomiliki na ile helikopta aliyonunua, ghafla alibadilika na kuanza kutoka jasho kwa wingi na kuzimia,” kilisema chanzo hicho.

 

Akithibitisha jambo hilo, Mchungaji Yekonia Behanaze alikiri kuwepo kwa maswali hayo, lakini alilalamikia namna alivyokuwa akihojiwa na askari hao kwamba haukufuata hali ya kibinadamu.

“Unajua hawakuwa na misingi mizuri ya kupata maelezo, walihojia mambo mengi sana hata yale tuliyoamini yangekuwapo tuliona hayakuzingatiwa badala yake iliegemea umiliki wa vitu,” alisema Mchungaji Behanaze.

Atembezwa akiwa Amezimia.

Baada ya kuzirai aliondolewa ndani ya chumba hicho ili kumuwahisha hospitali kwa ajili ya kupata matibabu.

Hata hivyo, kulitokea mabishano makali kati ya polisi na viongozi wa kanisa hilo, ambapo upande wa polisi ukitaka kumpeleka katika Hospitali za serikali, viongozi hao waling’ang’ania kwenda Hospitali ya TMJ.

 

Ilipofika Saa 3:00 usiku, polisi walimchukua  na kumuingiza katika gari lenye namba T 215 aina ya Noah na kumpeleka Hospitali ya Kilwa Road inayomilikiwa na jeshi hilo.

Hapo alitibiwa kwa muda wa saa tatu na ilipofika saa 5:08 usiku alichukuliwa na gari la wagonjwa lenye namba DFP 6309 na kupelekwa Hospitali ya Taifa ya Muhimbili.

Msafara wote ulikuwa chini ya ulinzi mkali wa polisi, ambapo wakati akielekea Muhimbili, msafara huo ulikatisha mitaa ya Kurasini, Kariakoo, Faya na kuishia Hospitali ya Muhimbili majira ya saa 5:18, usiku. Hata hivyo,  pande mbili hizo kati ya polisi na waumini ziliendelea kushindana kuhusu hospitali inayofaa kumtibia.

Wakiwa Hospitali ya Muhimbili, viongozi wa kanisa hilo ndugu na jamaa wa Gwajima waliendelea kushinikiza kuondolewa hapo ili apelekwe TMJ ambako walidai ndipo alipokuwa daktari wake.

Hata hivyo, hoja hiyo ilipingwa na polisi wakiwaeleza Muhimbili ndiyo Hospitali Kuu na watakubaliana nao endapo madaktari watashauri kuondolewa kwa barua maalum.

Ilipofika majira ya saa 6:00 usiku gari la wagonjwa kutoka Hospitali ya TMJ lenye namba T 786 BYK liliwasili na kukaa tayari kumchukua.

 

Saa 7:00 usiku Askofu Gwajima alitolewa hospitalini hapo akiwa bado amezirai na kuingizwa katika gari hilo na kumkimbiza Hospitali ya TMJ. Katika msafara huo, magari yalipita mitaa ya Upanga, daraja la Selander, Morocco na hatimaye  hospitalini hapo na kulazwa wodi ya wagonjwa mahututi (ICU).

Hali yake kwa sasa

Hata hivyo taarifa zilizopatikana kutoka Hospitali ya TMJ, zinaeleza bado hali yake si nzuri kutokana na kutorejewa na fahamu.

 

Kwa mujibu wa daktari anayempatia matibabu, Dk. Photonatus Mazigo, hali ya mgonjwa wake bado ni mbaya japokuwa kuna dalili ya kupata fahamu taratibu.

 

“Kwa ujumla hali ya mgonjwa siyo ya kuridhisha, hajazinduka tunachokifanya ni kumpatia tiba ili arejee katika hali yake ya kawaida,” alisema Dk. Mazigo.

Slaa, Baregu wafika hospitalini

Saa sita mchana, Katibu Mkuu wa Chama cha Demokrasia na Maendeleo (Chadema), Dk Willibroad Slaa alifika hospitalini hapo akiongozana na Mjumbe wa Kamati Kuu, Profesa Mwesiga Baregu kumwona Gwajima.

Baada ya kumwona mgonjwa, Dk Slaa alizungumzia utata unaowapata watu wanaohojiwa na polisi, huku akisisitiza kuna vitu vinatakiwa kufanyiwa kazi, ikiwamo kubaini kuna nini.
 

Alisema sheria za kuhojiwa zipo wazi kuwa mtu asihojiwe zaidi ya saa nane, vitu kama hivyo vinatakiwa kuzingatiwa katika mahojiano.
 

“Nyinyi kama waandishi ndiyo kazi yenu kuangalia kwa undani kuna nini kinaendelea katika haya mahojiano hadi mtu anapoteza fahamu, siyo huyu hata kama kuna mwingine ilimtokea hali hiyo,” alisema Dk Slaa.
 

Akizungumza hali ya mgonjwa kwa mtizamo wake, alisema kuwa daktari anayemtibu hawajawafahamisha nini kimempata, lakini kwa bahati mbaya hata mgonjwa mwenyewe hawezi kuzungumza na wao hawakuweza kumuuliza chochote, hivyo hana la kusema.
 

“Angekuwa anazungumza, labda angeniambia ilikuwaje, lakini hawezi hivyo sijapata lolote kutoka kwake wala daktari,” alisema Dk Slaa

Dar es Salaam: Wafanyabiashara wa Kariakoo Waendelea Na Mgomo Kushinikiza Mahakama Imwachie Huru Mwenyekiti Wao

Wafanyabiashara wa eneo la Kariakoo Jijini Dar es Salaam wamefunga maduka yao hii leo, kushinikiza mahakama kumuachia huru Mwenyekiti wa Jumuiya ya Wafanyabiashara nchini Johnson Minja.

Hapo jana Mahakama Mkoa wa Dodoma ilimfutia dhamana Minja kutokana na kukiuka masharti ya dhamana aliyopewa ikiwemo ya kutowazuia wafanyabiashara kufunga maduka yao wakati kesi yake inaposikiliwa mahakamani.

JUMUIYA YA WAFANYABIASHARA WILAYA YA RUNGWE WAFANYA MKUTANO .

Katibu tawala wilayani Rungwe Moses Mashaka aliyemuwakirisha mkuu wa wilaya hiyo,Zainabu Rajabu akitoa majibu mbele ya wafanyabiashara kuwa ofisi yake haijapokea ongezeko la kodi wala punguzo,

Mwenyekiti wa Jumuiya hiyo ya Rungwe Abdul Fungo akifuatilia kwa makini mkutano huo.

Mwenyekiti wa Jumuiya ya wafanya Biashara Mkoa wa Mbeya Stephano Mwandiga akitoa ufafanuzi juu ya serikali kuwakandamiza  wafanya Biashara

Meneja wa TRA Wilaya ya Rungwe Poul Alalaze Akipitia sheria kabla ya kutoa majibu kwa wafanyabiashara.

Jumuiya ya Wafanyabiashara Wilayani Rungwe wakisikiliza Wageni na Viongozi waalikwa wakiwa katika mkutano uliofanyika jana

Lowassa Amjibu Nape Nnauye.....Ahoji ni Kikao gani Cha Chama Kilichomtuma Kutoa Tamko??....Apokea Maandamano ya Vijana 60 Toka Mbeya Wakimtaka Agombee Urais

SIKU  moja baada Katibu wa itikadi na Uenezi wa Chama cha Mapinduzi (CCM) Nape Nnauye kutoa kauli ya chama hicho kuhusu makundi yanayojitokeza kumshawishi waziri mkuu mstaafu Mhe Edward Lowassa kugombea urais, kuwa yanaweza kumkosesha sifa kiongozi huyo ya kuwania nafasi hiyo, Mh. Lowassa amejibu kauli hiyo na kudai anashangazwa nayo huku akihoji imetokana na maamuzi ya kikao gani ndani ya CCM.
 
Lowassa  amedai kuwa hana njia ya kuwazuia watu wasimuombe agombee Urais  na ametoa  ombi kwa wale wote ambao bado wana nia ya kumshawishi agombee nafasi hiyo ya urais, wasubiri kwanza hadi pale chama chake hicho kitakapotoa maelekezo.

 

Akizungumza na vijana 60 wa bodaboda kutoka wilaya ya Mbarali, Mbeya waliokwenda pia kumshawishi agombee nafasi hiyo, mjini Dodoma jana, alisema si vyema kwa maofisa wa chama kuzungumzia masuala ya wanachama wao kwenye vyombo vya habari wakati kuna vikao vya chama.

 

Alisema watu waliojitokeza na kumshawishi kuchukua fomu za kuwania nafasi hiyo ya Urais, hajawaita wala kuwalipa chochote kama inavyodaiwa na kwamba walikuwa wakifuata maneno ya Rais Jakaya Kikwete aliyoyatoa mkoani Ruvuma katika sherehe za maadhimisho ya miaka 38 ya Uhuru.

 

Alisema katika siku hiyo, Rais Kikwete aliwataka watanzania wawashawishi viongozi wanaoona wanafaa ili wajitokeze kugombea nafasi hiyo ya Urais.

 

“Mimi ni vigumu kuzuia mafuriko kwa mikono. Nazuia mafuriko kwa mikono, yanakuja mimi nayazuia kwa mikono, nitaweza kweli? Hawa watu sina hoja nao, sina cha kuwaambia,” alisema Lowasa.

 

Alisema tangu makundi hayo yaanze kujitokeza kumshawishi kuchukua fomu mambo mengi ya ajabu yamesemwa jambo ambalo linamsikitisha na kumshangaza kwa kuwa endapo kuna mtu wa chama mwenye hoja, ni vyema kuwasilisha kwenye vikao vya chama badala ya kuzungumza hadharani na kwenye vyombo vya habari.

 

Alisema mambo ya chama humalizwa kwenye vikao vya chama, ambapo majadiliano hufanyika na mwisho wa siku watu huelewana na kamwe mambo yanayohusu chama yahawezi kuzungumziwa kwenye vyombo vya habari., televisheni na redio jambo ambalo ni hatari sana.

 

“Niseme mawili tu yanayonisikitisha, wanasema mnakuja nimewaiteni ninawapa fedha, hela za kuwapa ninazitoa wapi? Mkija hapa nikiwawekea maturubai ni kosa, mkiwa na viti ni makosa na wanasema nawapikieni chakula, mambo ya ajabu sana,” alisema.

 

Alisema juzi vijana takribani 300 walimtembelea nyumbani kwake, na kushangaa ni namna ipi angeweza kuwapikia chakula vijana wote hao.

 

“Ni vibaya sana kumdhalilisha mwenzako kwamba maisha yake yote akili yake ni kufikiria tumbo, huyu hana cha kufikiria isipokuwa tumbo, kwa hiyo mnakuja hapa kwa sababu mnataka Lowasa awape chakula, ni kudhalilisha watu,” Alisema watu waliomtembelea walikwenda kwa utashi wao wenyewe, kwa gharama zao.

 

“Sijawaona, sijawatuma, ama mmeniona huko? Nimekuja kuwashawishi? Nimewahi kuja huko Mbarali kuwashawishi mje kwangu? Au nimewapeni hela leo mlipokuja hapa, hata soda zenyewe hamjanywa.”

 

Aliwataka wale ambao wanapanga kumshawishi waache kwanza hadi wapate maelekezo ya chama ili kuepusha migogoro kwenye chama hicho.

 

“Nina uhakika tutapata nafasi, jambo moja ninataka kuwapa matumaini ipo siku watanzania watapata uhuru wa kusema juu ya mtu, iko siku watapiga kura zao kusema kwa hiyo tungojee hiyo siku.
 
"Nina uhakika wapo watanzania wengi wanaonipenda kama walivyosema kwa kazi zangu, watapata nafasi ya kusema naam ama hapana, kwa hiyo huyo anayepiga kelele nyingi sijui nitoke chama sijui nifanye kitu gani angoje wanaCCM na watanzania waamue,” alisisitiza.

 

Alisema kitendo cha kufuatwa na makundi mbalimbali ya watanzania kumshawishi kuwania nafasi ya Urais, kinatokana na ukweli kuwa anaaminika na kupendwa kutokana na mambo mengi aliyoyafanya.

 

Kwa takribani wiki nzima sasa, Lowasa amekua akipokea makundi mbalimbali ya watu wakiwemo wazee wa CCM, mashehe kutoka Bagamoyo, wanafunzi wa Chuo Kikuu cha Dodoma (UDOM) na jana waendesha bodaboda kutoka Mbarali wakimtaka achukue fomu kuwania urais.

Edward Lowassa akisalimiana na Kamanda wa Vijana Wilaya ya Mbarali ambaye ni Mfanya Biashara, Ibrahim Ismail Mwakabwangas alipowasili eneo hilo na ujumbe wake.

Ibrahim Mwakabwangas akizungumza. 

Lowassa akipokea salama hizo.

Mwenyekiti wa Bodaboda Mbarali, Yahya Katagara akizungumza.

Kamanda wa Vijana Ibrahim Ismail Mwakabwangas akizungumza na makada wake.

Lowassa akiagana na ujumbe huo.

CWT yapasuka, Chama kipya cha Walimu chasajiliwa na Wanachama zaidi ya 9,000

 

---

CHAMA kipya cha Kutetea Haki na Maslahi ya Walimu Tanzania (CHAKAMWATA) kimesajiliwa rasmi na kupata cheti cha usajili wa kudumu kutoka Wizara ya Kazi na Ajira.


Akizungumza na FikraPevu, Katibu Mkuu wa Chakamwata, Mwalimu Meshack Kapange, anasema chama hicho kipya kinaundwa na walimu nchini waliojiondoa kutoka mikononi mwa Chama Cha Walimu Tanzania (CWT). Kapange amesema mchakato wake wa kukisajili chama hicho ulianza miaka minne iliyopita, hadi hivi juzi kilipopewa usajili wa kuendelea na shuhuli zake kisheria.


“Ni furaha iliyoje kupata usajili huu wa chama chetu cha kutetea haki na maslahi ya walimu? Huu ni ukombozi kwa walimu wanaokatwa asilimia mbili za mishahara yao bila kurejeshewa wanapostaafu,” anasema Katibu Mkuu huyo.


Kuundwa kwa chama kipya hicho kumetajwa na wachambuzi wa mambo kwamba kunaweza kuipasua CWT na pia kutahitimisha ukiritimba wa muda mrefu mrefu wa chama hicho. Aidha, chama hicho kitatoa fursa sasa kwa walimu nchini kuwa na hiyari ya kujiunga na chama ambacho wataona kina maslahi kwao badala ya ilivyo sasa ambapo walimu walikuwa hawana chaguo zaidi ya kujiunga na CWT.


Kwa mujibu wa Mwalimu Kapange, Makao Makuu ya sasa ya chama hicho yatakuwa Jijini Mbeya.

Anasema walimu watakaohitaji kujiunga na chama hicho kipya, watafanya hivyo kwa hiari yao kama sheria za kazi zinavyoelekeza tofauti na CWT ambayo kila mwalimu anayepata ajira serikalini alikuwa analazimishwa kujiunga na kuanza kukatwa fedha zake kutoka kwenye mshahara wake bila ridhaa yake na kinyume cha sheria za ajira.


“Kila mwanachama atachangia asilimia moja tu ya mshahara wake kwa kila mwezi badala ya asilimia mbili kama ilivyo kwa CWT. Wakati mwanachama anapostaafu, atapewa ‘bonus’ kama asante kwa kuchangia Chama,” anasema Mwalimu Kapange.


Mbali na hilo, Kapange anasema Chakamwata kitafanya jitihada za kuwajengea wanachama wake uwezo wa kutambua wajibu wao, haki zao na jinsi ya kuzidai, badala ya kutambua wajibu pekee kama ilivyo ndani ya CWT, kwa maelezo kwamba hakuna wajibu kwa mtumishi yeyote wa umma usiokwenda sambamba na haki yake.


“Tulipokuwa tukiomba usajili kwa mara ya kwanza Mei, 2012, tulikuwa wanachama 400 ingawa masharti ya kisheria ya kuanzisha vyama kama hivi yanataka wanachama 20 tu. Nashukuru kwamba hadi tunapata usajili huu, wanachama wetu wanafikia 9,743, wengi wao wakitokea mikoa ya Mbeya, Iringa, Njombe, Rukwa, Ruvuma, Arusha, Mara, Morogoro, Singida na Kagera,” amesema.


Chama kipya hicho, kabla hakijasajiliwa, kilikuwa kikijulikana kwa jina la Umoja wa Maofisa Elimu Tanzania (UMET). Hata hivyo, uongozi wa muda wa chama hicho ulikaa tena na kukipa chama hicho jina la Chakamwata. Chama hicho kimepewa usajili kwa namba 031, huku cheti chake kikiwa kimesainiwa na Msajili wa Vyama Huru vya Wafanyakazi na Waajiri nchini, Doroth Uiso.


FikraPevu inaendelea kumtafuta Rais wa CWT, Gratian Mukoba, pamoja na maoni ya walimu mbalimbali nchini, ili pamoja na mambo mengine, waweze kuelezea ujio wa chama kipya hicho cha walimu nchini na athari zake katika mstakabali wa mshikamano na utengamano wa walimu nchini katika siku za usoni.

Watu 6 Wafariki Dunia Usiku Wa Kuamkia Leo baada ya Magari Manne Kugongana Huko Nzega.....Hapa kuna Picha 10 Toka Eneo la Ajali

Watu 6 wamefariki  dunia  na  wengine  9 kujeruhiwa  vibaya  katika  ajali  mbaya   iliyohusisha  magari  manne  huko Undomo wilayani Nzega  usiku  wa  kuamika  leo.

Maamuzi ya Mahakama kuhusu kesi inayomkabili Chris Brown!!

Baada ya kutumikia kifungo cha miaka sita akihukumiwa kwa kosa la kumpiga aliyekuwa girlfriend wake Rihanna, kuna maamuzi ambayo mahakama ya Los Angeles imetoa kuhusiana na hitmaker wa nyimbo ya ‘New flame‘ Chris Brown.

Ni miaka sita tangu mwanamuzi Rihanna amshtaki Chris Brown kwa kosa la kumpiga na kutumikia adhabu hiyo ambayo alikuwa katika kipindi cha majaribio na sasa yuko huru baada ya kesi yake kumalizika.

Katika kuonyesha furaha yake Chris Brown baada ya kutoka mahakamani hapo aliandika kwenye ukurasa wake wa Twitter kuwa anamshukuru  Mungu kwa kuwa yupo huru.

“IM OFF PROBATION!!!!!!!! Thank the Lord!!!!!!”

Zitto ajiunga rasmi na Chama cha ACT-Tanzania, akabidhiwa kadi namba 007194

Mh. Zitto Kabwe akilipa kwa ajili ya usajili wa kadi ya uanachama wa ACT.

...Kumwaga ‘mboga’ mbele ya wandishi wa Habari Jumapili hii Machi 22

Na Andrew Chale wa Modewji blog

Hayawi hayawi…Sasa yamekuwa licha ya kusemwa sana kwa muda mrefu juu ya kuhusishwa na chama kipya cha siasa cha ACT-Tanzania dhidi ya aliyekuwa Mbunge wa Kigoma Kaskazini Zitto Ruyagwa Kabwe sasa yamekuwa kweli kwa Mbunge huyo baada ya leo Jumamosi ya Machi 21, kupokelewa rasmi na chama hicho na kukabidhiwa kadi yake yenye namba 007194.

Hii  inafuatia siku moja baada ya Zitto kutangaza kuachia ubunge na kuandika barua rasmi ambapo sasa amekuwa mwanachama wa ACT-Tanzania na kuahidi kuendeleza mapambano ndani ya chama hicho.

Mh. Zitto Kabwe akisaini kadi ya uanachama wa ACT.

Hata hivyo, kwa mujibu wa viongozi waandamizi wa ACT-Tanzania wamedokeza kuwa, Zitto ataongea na vyombo vya habari Jumapili ya Machi 22.

Endelea kufuatilia EDDY BLOG kwa tukio hilo tutakalowaletea kila kitakachojiri katika mkutano huo, kujua ni wapi na muda gani  endelea kuperuzi nasi.

ACT-Tanzania: kirefu chake ni :  Chama cha Alliance for Change and Transparence (ACT-Tanzania). Makao makuu ya chama hicho yapo Kijitonyama Jijini Dar es Salaam, Tanzania.

Mh. Zitto Kabwe akikabidhiwa rasmi kadi ya uanachama wa ACT.

Mwanachama rasmi wa ACT Mh. Zitto Kabwe akipokea kadi hiyo.

“He..he he mnipokeee sasa kwa mikono miwili….:, Mh. Zitto Kabwe akionyesha kadi hiyo kwa baadhi ya wanachama waliosimama (hawapo pichani) nje ya ofisi za chama cha ACT tawi la Tegeta,

Mh. Zitto Kabwe akibadilishana mawazo na viongozi wa Chama cha ACT mara baada ya kupokea kadi hiyo.

Mh. Zitto Kabwe akiwa amefuatana na Prof. Kitila Mkumbo ambaye pia ni mwanachama wa ACT.

Mh. Zitto Kabwe akivalishwa skafu ya ACT mara baada ya kupokea rasmi kadi ya chama hicho mapema JANA.

Na hii ndio kadi rasmi ya Mheshimiwa Zitto Kabwe aliyokabidhiwa.